Parmata Freelancer

Wen, umakarak manen iti blog. Bisitaenyo ti Parmata idiay Wordpress. Mayat ti Wordpress ket, adda pay maysa a blog ko sadiay maipapan met iti panagbalin nga anak ti maysa a Pastor.

Maysa pay a damag maipapan kaniak. Apaman a mangrugi ti Oktubre, maysa akon a freelance writer. Adu dagiti online markets a pagsuratan ket, isu nga mayat sa ti agurnong iti dolyar. heheh. Barbareng la nu makaurnong. Maysa pay ket siak ngamin ti Pangulo ti National United Methodist Youth Fellowship in the Philippines--nadagsen a trabaho ta adu dagiti rumbeng nga aramidenmi. Iti panagbalin ko a freelancer, iggem ko ti oras ko ket siak metten ti makaammo iti adu a bambanag maipapan iti panagtrabahok kas koma iti SSS, Pag-ibig ken dadduma pay.

Adda bassit panagkitakit ti riknak ngem exciting met laeng daytoy. Risky, kunada pay iti ingles ngem maymayaten ti kasta ta siak met la ti boss ko. Heheheh.

Ala ngaruden, nu kayat yo pay ti agbasa iti ad-adu, bisitaen ti link idiay ngato. Dios ti agngina.

Panagriing ken Panangikkat ti Mukat!

Nabayag metten a panawen ti napalabas manipud naudi a panagsurat ko ditoy a blog. Nabayag metten nga awan ti insubmitar ko iti Bannawag. Amangan la ketdi nu diakon ammo ti agsurat. heheh. Nu apay to met ngamin nga nakaad-adu ti ar-aramiden. Nagadu nga seminar nga organisaren ken atendaran ket ania ka pay dita a pakasikuran.

Urayen. Kas tay kunada, nu saan nga biruken ta ubet ti tugaw ni mannurat ken dayta ima (ken ramramayen ah), ti pluma ken papel, awan mapasamak. Sa pay nagadu ti kapanunutan a mabalin la koma a maisurat.

Di bale ta adu man ti mabalin a pakisalipan itan. Ipadas manen ti mangikur-i kur-it kadagit dandaniw kas kada sarita. Barbareng la adda pakaisab-tan nga gunggona.

Ala ngaruden, agsuratak manen!

Isabel A: Maysa a Panagpakada
Mighty C. Rasing

Lumasatak iti Karayan ti Magat
Bumallasiwak kadagiti banbantay ti Cordillera
Umadayoak kenca, Umadayoak kenca.

Pakawanennak Isabel A agpakadaakon
Pumanawak ken umadayo kenca
Nadagsen ti barukong, nasaem ti rikna.

Duata a nangbuangay kadagiti arapaapta,
Sirmata ken ayat ti nagtaudanda
Balonek dagitoy a sinanama.

Nalabit a saludsodem no apay
Nga umadayoak idinto a ti karik
Ket isayangkatta dagitoy a sirmata.

Diak mabaelan ti agtakder a maipaay kenca
No diak umadayo ita. Sapulek ti bagik
Sapulek ti biag a maikari kenca.

No agtalinaedak iti sidongmo, awan
Met laeng ti maipaay ko kenca. Awan met laeng
Ti pagturongan dagiti arapaap ta ken sirmata.

Amin a banag nga innak sapulen, amin
A personalidad a pagbalinak, agraman ti amin
Kaniak, ipaayko kenca. Agsubliakto iti sibay mo.

Iti isasangbay ti lugan a mangyadayo
Kaniak iti taengmo, diak ammo
No ania ti agur-uray a masakbayak.

Nupay kasta, dagiti saksaksak aglumbada
A mangsabat iti aniaman a masangoanak
Agsipud ta sika ti pangyegak amin a mabalinak.

Tallo a gasut a kilometro, dua a gunglo
Dagiti turod ken bantay ti agbalin a baet ta
Ngem diakto pulos a manglipat kenca.

Toy Kinakurapayko
Mighty C. Rasing

Napno iti dapo ti dalikan
Adu ti pagsungrod a kayo
Ngem awan met mailuto.

Nadalus ti papel iti rabaw
Ti lamisaan, ad’ta ti pluma
Ngem ti panunot ita, namaga.

Na’tianan ti tanggal, awan
Ti ikan a makalap, namaga
Met dagiti ulep iti tangatang.

Masapul ko ni Elias a mangyeg
Gil-ayab ditoy datonko tapno
Agtudo iti kapanunotan nga adu.

Innak man pay agpuros ti saluyot
Agsapul ti rabong, aguggot
Ti gubay barbareng maikkat

Ti panagsaraaw ti buksit. Ket no
Awan, an-anusan ‘ta tuyo
Nga ipauneg ken pakapnekan.

Makurkuriro, maburburibor ti isip
Ko, ngem awan maisurat, awan
Maikur-it uray bassit, sadino ti ‘yan

Ti pannakabalin ti pluma? Ti Mutya
A sinurotko? Daytoy ti kinakurapayko
Iti sarita; agraman ngata iti kinapudno?

*****
Rumbeng kadi nga innak ilako
Ti bagik ken kararuak tapno
Malibasak toy kinakurapayko?

02 April 2006

Adtoy man ti sumagmamano a daniw a naputar ko kadagiti napalabas a bulbulan. Awan unay naikur-it ko kadagiti naglabas nga aldaw. Makilumlumbaak sa metten iti rat-race ti corporate world. Ultimo agbasa ket malipatanen nu dadduma...

Nupay kasta, adda latta updates ditoy blog. Sapay koma ta makamatko manen tay "Muse" a kunkunada. >mighty

---------------------------------------------
Idiay Laud
Mighty C. Rasing

Idiay Laud ti pagtaudan
Dagiti naimas a makan;
Nanam-ay ti biag sadiay, nangangato
Dagiti pagnaedan.
Aglaplapusanan dagiti sanikua
Maibelbelleng laeng.
Adu pay ti napapateg a gameng.

Imported kunam man!

Idiay Laud ti ayan dagiti
Agkakapintas a babbai;
Adda sadiay ti Sirib, pigsa
Ken saririt. Kaadduan a tattao
Agtarigagay a mapan sadiay—
Dagiti arapaap, sirmata ken
Ragsak, idiay, agur-uray.

Ngata?
Isu met kunada.

Ngem ti Laud inalun-onna
Ti Init nga impasngay ti Daya.

Maysa a Daniw

Ibingay ko man daytoy daniw a naputar ko idi Marso. Insubmitar ko daytoy iti Bannawag ngem diak metten nasiputan nu naipablaak sadiay. Diak ngamin ammo no sadino't paggatangan nga asideg iti pagnanaedak idiay Fairview. Innak to man la mangala ti subscription ko. :)

--------------
Pluma ken Dara
Mighty

Agay-ayus ti darak
iti pluma nga iggemko
Kas iti panagkadua ti tammudo
Ken tangan, dinto agsina
Ti panunot ken obra.

Apagbiit la nga agmaga toy dara
Nga agarubos manipud kaunggan ti rikna
Bay-am nga agsayasay
Tapno dagitoy dungir ken sugat
Nalaklaka nga umimbag.

Ket ti darak nga agaruyot
Iti daytoy a pluma
maimantsa
Iti papel. Ken daytoy a papel
Dinto agkupas wenno madadael.

Diak met napasarunoan a dagus ti damo a post ko ditoy a blog. Nagbayagen. Hmmm, adda met rason ko a ketdi. Kaak-akar ko laeng iti baro a trabaho idi Marso 16. At last, nakaikkatak met laeng iti trabahok iti call center. Agasem, makisao ka kadagiti Australyano iti telepono iti walo nga oras inaldaw, lima nga aldaw iti makalawas. Ay na Apo! Imbag ta naanusak. Kasano ket adda met ngamin bond mi a sangagasut a ribo! Nu umikkatak iti trabaho iti nababbaba ngem makatawen, ay ket bayadak a dayta a gatad. Pangal-alaak ngay iti kasta kadakkel a kuarta?

Ngem napalabas daytan. Diakon kayat ti agsubli iti maysa a call center.

Ngem apay aya a simrekak idiay? Ibagak lattan nga economic emergency. Kalpasan ti trabahok a kas English teacher idiay San Mateo, Isabela, nagaplayak iti State University mi, daksanggasat ta awan pangilugaran da kaniak. Nagaplayak manen iti Regional Office ti NEDA, ngem kaskasdi nga awan ta naabutanak ti proklamasyon ni Presidente Gloria nga freeze hiring ti gobyerno. Ania ngay, di awan trabahok iti sumagmamano a bulan! Pa-sideline, sideline pay laeng idi ah.

Ngem iti maikawalo a bulan nga wan trabahok, ne matuokannakon. Nupay diak koma kayat ti pumanaw iti dungdungngoek a probinsiya ket pimmanawak. Kalpasan dayta, nanggedakon iti call center. Mayat met ah ti suweldo, dakkel kumpara iti suweldok a kas mannursuro idi, ngem boring, awan fulfillment na. Ngem uray kaskasano, nakaurnong met bassit.

Ita addaakon iti maysa met laeng a BPO (Business Process Outsourcing) a kumpanya ngem imbag ta saan a call center, e-mail ti kadawyan nga usarenmi ditoy.

Maysa pay, mayat ti puwestok iti opisinami idiay Libis, Quezon City. No mumalemen, makitak ti nalabaga nga init a kasla dakkel a mata a mangbuybuya kadagiti babbalay a nasingitan dagiti berde dagiti kaykayo. Makaay-ayo la unay.

Ditoy baro a trabahok, nalawlawa ti panawen ko nga agsurat iti aniaman. Sapay la koma ta maitultuloy ko ti agsurat iti nilawas.

Awagak ngatan ti bagik a maysa a mannurat?

Nalabit saan pay. Agsasaoak iti Ilocano (wenno Iluko) nu addaak iti balaymi, nu kasaok ni tatang ken ni inang ko agraman dagiti kakabsat ko. Ngem sabali a tungtungan ti panagsurat iti Iluko. Narigat.

Sabagay a! Narigat a talaga ti agsurat uray nu ania a pagsasao ti pilien nga usaren. Nupay kasta, agsuratak latta--maipapan iti biag, kadagiti pasamak iti lubong ken pagilian, iti bukod ko a biag, ken aniaman a pakakumikuman iti biag ti maysa a baro nga nupay adda iti ciudad ket saan a maikkat nga isu ket maysa nga Ilocano.

Rugiak iti daytoy a 'blog' ti mangtakuat iti timekko a kas mannurat.