Sumagmamano a Kapanunotan iti Panaggibus ti Tawen

Nabayag met bassit manipud diay naudi a panagblogko ditoy Parmata.Blogspot.com. Nakaad-adu met ngamin ti pakakumikoman ken no ania la dita dagiti proyekto a maipatto kaniak. Di pay masango dataon ti agikur-it iti sarita, piman!

Adda met ketdi a naipablaak a sumagmamano a saritak iti kallabes a bulbulan. No diak agkamali, adda metten lima a sarita a naputarko ti naipablaak iti Bannawag. Dua kuadakada ti napadayawan a nangabak iti Premio Reynaldo A. Duque. Napadayawan iti umuna a gunggona diay “Tiket” idinto a Maikadua a Gunggona met diay “Dagiti Doliar ni Ben.” Naipablaak met ti “Iti Tuktok ti Lubong,” “Positibo,” ken “Kaarruba.”

Mamatikay man wenno saan, nasuratko dagitoy a sarita iti unos laeng ti dua ket gudua a bulan—idi Abril ken Mayo 2010! Kinaritko ketdi ti bagik nga agsurat iti sarita kalpasan a natiliwko met laeng ti sikreto ti panagsurat iti daytoy a porma ti literatura.

Idi damo ngamin, puro daniw ti sursuratek. Panagkunak, diak marigatan a dumaniw. Ngem tunggal padasek idi ti agsurat iti sarita, na a ta bumdengak met ta diak ammo ti istrukturana ken diak ammo no kasanon panangsangalko!

Di bale, naalakon ti basic skill a masapulko tapno makapagsuratak iti sarita. Rumbengko laengen nga asaen daytoy a pannakaammok ken itultuloyko pay ti agsurat, mapadayawanak man iti gunggona dagiti pasalip wenno saan.

---------

Simple laeng ti agbiag. Masansan ngamin, adu ti itukit ti biag a pakaringgoran ken pakadanagantayo. Inton kuan, mariknatayon ti bannog ken pannakapukaw ti kappia iti puso ken panunot. Kasta ketdi ti napasamak kaniak iti daytoy a tawen. Gapu ta adu unay dagiti commitmentsko, kasla awanen panawen tapno agpampanunotak ken utobek ti kasasaadko iti biag.

Pagyamanak laeng iti Namarsua ta aggibus ti maysa a tawen ket sukaten ti sabalin a tawen. Saan a malapdan ti yaadanik iti masakbayan. Kararagko laeng nga agtultuloy koma ti kinaimbag ni Apo Dios ket masursurok met ti agpili kadagiti nasayaat nga aramid ken ganuat. 

Iti iseserrek ti 2011, adu dagiti commitments nga ibbatak. Piliek laengen dagiti pagay-ayatko la unay nga aramiden, kas koma iti panagsurat iti daniw, sarita ken salaysay. Barbareng a, mabaelak ti agsurat ditoy blogko iti linawas tapno makitayo met gagayyem ti biag ni Ilocano in the City.